फुले आणि देव

बर्‍याच काळानंतर

ऋतूंच्या खेळानंतर
बहरलेली ती फुले
आज देवाला पावली

निसर्गाने मेहनतीने केलेल्या
संगोपनाची कथा
एका क्षणात सार्थकी झाली
बहरलेली ती फुले
आज देवाला पावली

ऊन, वारा, पाणी
सगळ्यांचे परिपूर्ण मिश्रण
त्या कळीला वाढवण्यात
दिवसरात्र झटलेले असते
कळीपासून आलेली ती फुले
क्षणात झाडापासून वेगळी झाली
बहरलेली ती फुले
आज देवाला पावली

सुईच्या टोकातून
एकसंध धाग्यातून
प्रवास करून
देवाला पुजण्यासाठी
त्यांची माळ सज्ज झाली
बहरलेली ती फुले
आज देवाला पावली

प्रसन्न भक्तांनी ती माळ
देवाला समर्पित केली
देवालाही ती छान भासली
बहरलेली ती फुले
आज देवाला पावली

सगळं काही समर्पित करून
फुले स्वतः मात्र कोमेजून गेली
कोमेजलेल्या फुलांना देव नाही म्हणाला
भक्तांनी सारी फुले कडेला टाकून दिली
स्वतः संपूनही आनंदी राहिली
कोमेजलेली ती फुले
आज देवाला पावली

- गिरीश सोनवणे


All content subject to copyright